PDP-STD-02a · v1.0 · მოქმედი ვერსია · ძალაშია 14.08.2026-დან
კომპანია (იხ. შესაბამისი კომპანიის კონფიდენციალურობის შეტყობინება) პატივს სცემს თქვენს პირად ცხოვრებას და პერსონალურ მონაცემებს ამუშავებს საქართველოს მოქმედი კანონმდებლობის, მათ შორის „პერსონალურ მონაცემთა დაცვის შესახებ" საქართველოს კანონის, მოთხოვნების შესაბამისად.
წინამდებარე ჩარჩო განმარტავს პერსონალურ მონაცემთა დამუშავების საერთო პრინციპებსა და წესებს. კონკრეტული კომპანიის კონფიდენციალურობის შეტყობინება განსაზღვრავს კომპანიის ვინაობას, საკონტაქტო ინფორმაციას, მის მიერ დამუშავებული მონაცემების კატეგორიებსა და წყაროებს, დამუშავების მიზნებსა და სამართლებრივ საფუძვლებს, მიმღებებს, შენახვის ვადებს, საერთაშორისო გადაცემის პირობებს და სხვა სპეციფიკურ გარემოებებს.
ვებგვერდის ან სერვისის გამოყენება თავისთავად არ ნიშნავს ამ ჩარჩოში აღწერილ ყველა სახის პერსონალურ მონაცემთა დამუშავებაზე თანხმობას. თითოეული დამუშავება ხორციელდება შესაბამისი სამართლებრივი საფუძვლით, ხოლო როდესაც საფუძვლად თანხმობა გამოიყენება, თანხმობა მიიღება კონკრეტული მიზნისთვის, წინასწარი ინფორმირების შემდეგ და მისი გამოხმობა შესაძლებელია კანონით დადგენილი წესით.
კონკრეტული კომპანიის დასახელება, საიდენტიფიკაციო კოდი, იურიდიული მისამართი, საკონტაქტო ინფორმაცია და, არსებობის შემთხვევაში, პერსონალურ მონაცემთა დაცვის ოფიცრის (DPO) ვინაობა და საკონტაქტო ინფორმაცია მითითებულია შესაბამისი კომპანიის კონფიდენციალურობის შეტყობინებაში. კონფიდენციალურობის შეტყობინების გარეშე წინამდებარე ჩარჩო არ წარმოადგენს კონკრეტული კომპანიის სრულ კონფიდენციალურობის შეტყობინებას.
ქვემოთ მოცემული კატეგორიები და მაგალითები არის სტანდარტული ჩარჩოს ტიპური ჩამონათვალი და ყველა კომპანიაზე ავტომატურად არ ვრცელდება. კონკრეტულად რომელი მონაცემები მუშავდება და რა წყაროდან მიიღება ისინი, მითითებულია შესაბამისი კომპანიის კონფიდენციალურობის შეტყობინებაში.
| კატეგორია | მაგალითები | წყარო |
|---|---|---|
| საიდენტიფიკაციო მონაცემები | სახელი, გვარი, პირადი ნომერი (საჭიროებისას) | თქვენ მიერ მოწოდებული |
| საკონტაქტო მონაცემები | ელფოსტა, ტელეფონის ნომერი, მისამართი | თქვენ მიერ მოწოდებული |
| ტრანზაქციული მონაცემები | შეკვეთის ისტორია, გადახდის დეტალები (ბარათის სრული ნომრის გარეშე) | თქვენი აქტივობიდან |
| ტექნიკური მონაცემები | IP მისამართი, cookie ფაილები, ბრაუზერის ტიპი, მოწყობილობის მონაცემები | ავტომატურად, ვებგვერდზე ვიზიტისას |
| კომუნიკაციის მონაცემები | მიმოწერა მხარდაჭერის სამსახურთან | თქვენი მომართვისას |
მონაცემები მუშავდება კონკრეტული მიზნებისთვის, მათ შორის მომსახურების/შეკვეთის შესრულებისთვის, მომხმარებელთა მხარდაჭერისთვის, ანგარიშსწორებისა და კანონით დაკისრებული ვალდებულებების შესასრულებლად, ინფორმაციული უსაფრთხოებისა და თაღლითობის პრევენციისთვის, სამართლებრივი მოთხოვნების დასაცავად და, შესაბამისი სამართლებრივი საფუძვლის არსებობისას, პირდაპირი მარკეტინგისთვის. თითოეულ მიზანს შეესაბამება კონკრეტული სამართლებრივი საფუძველი; თუ საფუძვლად თანხმობა გამოიყენება, იგი არ არის წინაპირობა იმ მომსახურებისთვის, რომლის შესრულებაც თანხმობას არ საჭიროებს.
| მიზნის მაგალითი | შესაძლო სამართლებრივი საფუძველი |
|---|---|
| შეკვეთის/მომსახურების გაფორმება და შესრულება | ხელშეკრულების შესრულება |
| ანგარიშფაქტურების გამოწერა, საგადასახადო აღრიცხვა | კანონისმიერი ვალდებულება |
| მომხმარებელთა მხარდაჭერა | ხელშეკრულების შესრულება / ლეგიტიმური ინტერესი |
| მარკეტინგული შეტყობინებები | თანხმობა |
| ვებგვერდის უსაფრთხოება და გაუმართაობის აღმოფხვრა | ლეგიტიმური ინტერესი |
| სამართლებრივი მოთხოვნების დაცვა/დავის წარმოება | ლეგიტიმური ინტერესი / კანონისმიერი ვალდებულება |
განსაკუთრებული კატეგორიის მონაცემების (მაგალითად, ჯანმრთელობასთან, ეთნიკურ წარმომავლობასთან, რელიგიურ ან ფილოსოფიურ მრწამსთან დაკავშირებული და კანონით განსაზღვრული სხვა განსაკუთრებული კატეგორიის მონაცემები) დამუშავება ხდება მხოლოდ „პერსონალურ მონაცემთა დაცვის შესახებ" საქართველოს კანონით გათვალისწინებული შესაბამისი სპეციალური საფუძვლისა და დამატებითი გარანტიების არსებობისას. კონკრეტული კომპანიის მიერ ასეთი მონაცემების დამუშავების შემთხვევაში შესაბამისი ინფორმაცია აისახება მის კონფიდენციალურობის შეტყობინებაში.
თუ კომპანიის საქმიანობა უკავშირდება არასრულწლოვანის მონაცემების დამუშავებას, კომპანია იცავს არასრულწლოვანის საუკეთესო ინტერესებს და კანონით დადგენილ დამატებით გარანტიებს. როდესაც დამუშავების საფუძველია თანხმობა, 16 წლის ასაკს მიღწეულ არასრულწლოვანს შეუძლია თანხმობის გაცემა კანონით დადგენილი წესით, ხოლო 16 წლამდე არასრულწლოვანის შემთხვევაში, როგორც წესი, საჭიროა მშობლის ან სხვა კანონიერი წარმომადგენლის თანხმობა; განსაკუთრებული კატეგორიის მონაცემებზე მოქმედებს კანონით დადგენილი დამატებითი მოთხოვნები.
ვებგვერდზე შეიძლება გამოიყენებოდეს აუცილებელი, ფუნქციური, ანალიტიკური და/ან მარკეტინგული cookie-ები და მსგავსი ტექნოლოგიები. არააუცილებელი cookie-ები გამოიყენება მხოლოდ შესაბამისი სამართლებრივი საფუძვლის არსებობისას და, როდესაც ამას მოქმედი კანონმდებლობა ან შესაბამისი ტექნოლოგიის გამოყენების პირობები მოითხოვს, წინასწარი თანხმობის საფუძველზე. კონკრეტულად გამოყენებული cookie-ების ტიპები, მიზნები, მიმწოდებლები, შენახვის ვადები და თანხმობის მართვის წესი უნდა იყოს აღწერილი კომპანიის cookie-ების შეტყობინებაში ან თანხმობის მართვის პანელში.
კომპანია პერსონალურ მონაცემებს არ ყიდის. მონაცემები შეიძლება გადაეცეს მხოლოდ კანონიერად განსაზღვრული მიზნით, შესაბამისი სამართლებრივი საფუძვლის არსებობისას და აუცილებელი მოცულობით. შესაძლო მიმღებთა კატეგორიები შეიძლება მოიცავდეს მომსახურების მიმწოდებლებს, IT/cloud პროვაიდერებს, გადახდის მომსახურების პროვაიდერებს, საკურიერო/ლოგისტიკურ კომპანიებს, ბუღალტრული და იურიდიული მომსახურების მიმწოდებლებს, სახელმწიფო ორგანოებსა და სასამართლო/სამართალდამცავ ორგანოებს კანონმდებლობით გათვალისწინებულ შემთხვევებში. კონკრეტული კომპანიის მიმღებები ან მიმღებთა კატეგორიები მითითებულია მის კონფიდენციალურობის შეტყობინებაში. თუ მესამე პირი მოქმედებს კომპანიის სახელით, ურთიერთობა ფორმდება კანონით მოთხოვნილი მონაცემთა დამუშავების პირობებით/ხელშეკრულებით.
მონაცემები ინახება მხოლოდ იმ ვადით, რომელიც აუცილებელია შესაბამისი მიზნის მისაღწევად ან კანონმდებლობით არის დადგენილი. კონკრეტული შენახვის ვადა ან, თუ მისი წინასწარ განსაზღვრა შეუძლებელია, ვადის განსაზღვრის კრიტერიუმი მითითებულია შესაბამისი კომპანიის კონფიდენციალურობის შეტყობინებაში; დეტალური საოპერაციო ვადები შეიძლება განისაზღვროს კომპანიის შიდა მონაცემთა შენახვისა და განადგურების წესებით.
მონაცემთა სხვა სახელმწიფოში ან საერთაშორისო ორგანიზაციაში გადაცემა ხორციელდება მხოლოდ კანონით დაშვებული საფუძვლით და, საჭიროების შემთხვევაში, სათანადო გარანტიების გამოყენებით. თუ კონკრეტული კომპანია ახორციელებს ან გეგმავს ასეთ გადაცემას, მისი კონფიდენციალურობის შეტყობინება უნდა შეიცავდეს კანონით მოთხოვნილ ინფორმაციას დაგეგმილი გადაცემისა და შესაბამისი გარანტიების შესახებ.
კანონის „პერსონალურ მონაცემთა დაცვის შესახებ" შესაბამისად, თქვენ გაქვთ უფლება:
კანონით ცალკეული უფლებებისთვის განსხვავებული ვადებია დადგენილი. ინფორმაციის მიღების, მონაცემთა გაცნობის/ასლის, გასწორების, დამუშავების შეწყვეტის/წაშლისა და თანხმობის გამოხმობასთან დაკავშირებულ შემთხვევებში ძირითადი ვადა, როგორც წესი, არაუგვიანეს 10 სამუშაო დღეა, ხოლო კანონით პირდაპირ გათვალისწინებულ შემთხვევებში იგი შეიძლება გაგრძელდეს არაუმეტეს 10 სამუშაო დღით სათანადო დასაბუთებით. მონაცემთა დაბლოკვასთან და პირდაპირ მარკეტინგთან დაკავშირებით მოქმედებს კანონით დადგენილი სპეციალური ვადები. კონკრეტული მოთხოვნისთვის გამოიყენება შესაბამისი კანონით განსაზღვრული ვადა. უფლებების განსახორციელებლად მიმართეთ შესაბამისი კომპანიის კონფიდენციალურობის შეტყობინებაში მითითებულ საკონტაქტო არხს.
თუ კონკრეტული კომპანია იყენებს მხოლოდ ავტომატიზებულად, მათ შორის პროფაილინგის საფუძველზე, გადაწყვეტილების მიღებას, რომელსაც მონაცემთა სუბიექტისთვის სამართლებრივი ან სხვა არსებითი მნიშვნელობის შედეგი აქვს, ასეთი დამუშავების არსებობა, მიზანი, გამოყენებული ლოგიკის შესახებ კანონით მოთხოვნილი ინფორმაცია, მოსალოდნელი შედეგები და მონაცემთა სუბიექტის შესაბამისი უფლებები მითითებულია კომპანიის კონფიდენციალურობის შეტყობინებაში.
კომპანია იყენებს რისკზე დაფუძნებულ ტექნიკურ და ორგანიზაციულ ღონისძიებებს პერსონალური მონაცემების კონფიდენციალურობის, მთლიანობისა და ხელმისაწვდომობის დასაცავად. ინციდენტის შემთხვევაში კომპანია მოქმედებს შიდა ინციდენტზე რეაგირების გეგმის შესაბამისად, მათ შორის აფასებს შეტყობინების კანონით გათვალისწინებულ ვალდებულებას.
კითხვების, მოთხოვნების ან საჩივრების შემთხვევაში დაუკავშირდით შესაბამისი კომპანიის კონფიდენციალურობის შეტყობინებაში მითითებულ საკონტაქტო არხს. უფლებების დარღვევის შემთხვევაში მონაცემთა სუბიექტს შეუძლია კანონით დადგენილი წესით მიმართოს სახელმწიფო აუდიტის სამსახურს, სასამართლოს ან/და ზემდგომ ადმინისტრაციულ ორგანოს, სადაც ასეთი ორგანო არსებობს.
წინამდებარე ჩარჩო და მასზე დაფუძნებული სტანდარტული დოკუმენტები (მათ შორის, კონკრეტული კომპანიის კონფიდენციალურობის შეტყობინება, შიდა პოლიტიკები და ხელშეკრულებების შაბლონები) წარმოადგენს Gamkrelidze & Partners | Legal Advisory-ის მიერ მომზადებულ სამართლებრივი შესაბამისობის დოკუმენტაციასა და ინსტრუმენტებს და გამოიყენება შესაბამისი მომსახურების ფარგლებში.
კონკრეტული დამუშავების მიზნებისა და საშუალებების გათვალისწინებით, კომპანია შეიძლება მოქმედებდეს როგორც დამუშავებისთვის პასუხისმგებელი პირი ან დამუშავებაზე უფლებამოსილი პირი. შესაბამისი როლის ფარგლებში კომპანია პასუხისმგებელია მის მიერ მოწოდებული ინფორმაციის სისწორესა და სისრულეზე, საკუთარი მონაცემთა დამუშავების საქმიანობის კანონიერებაზე, შესაბამისი ტექნიკური და ორგანიზაციული ღონისძიებების რეალურ დანერგვასა და შენარჩუნებაზე და ამ ჩარჩოსა თუ მასზე დაფუძნებული დოკუმენტების საკუთარ საქმიანობასთან შესაბამის გამოყენებაზე.
Gamkrelidze & Partners | Legal Advisory-ი ამზადებს სამართლებრივ დოკუმენტაციას და უზრუნველყოფს მასთან დაკავშირებულ იურიდიულ კონსულტაციას ცალკე გაფორმებული მომსახურების ხელშეკრულების პირობების შესაბამისად. ასეთი მომსახურება არ ცვლის შესაბამისი კომპანიის კანონით დაკისრებულ პასუხისმგებლობას მისი ფაქტობრივი მონაცემთა დამუშავების პროცესებზე და არ წარმოადგენს გარანტიას კომპანიის მიერ დოკუმენტირებული წესების ფაქტობრივი შესრულების შესახებ.
წინამდებარე ჩარჩო პერიოდულად შეიძლება განახლდეს. თითოეულ ვერსიას აქვს საკუთარი ნომერი და ძალაში შესვლის თარიღი. შესაბამისი კომპანია თავის კონფიდენციალურობის შეტყობინებაში მიუთითებს, ჩარჩოს რომელ ვერსიას ეყრდნობა. ახალი ვერსიის გამოქვეყნება თავისთავად არ ცვლის კონკრეტული კომპანიის მიერ მითითებულ მოქმედ ვერსიას, თუ კომპანიის კონფიდენციალურობის შეტყობინება შესაბამის ვერსიაზე არ განახლდა.
ვერსიების ისტორია: v1.0 — 14.08.2026 — პირველადი გამოქვეყნება.